Banka Popullore njoftoi sot se gjatë vitit të kaluar mbi 200 punonjës të bankave dhe institucioneve komerciale janë trajnuar nga ekspertë për zbulimin e shpejtë të mostrave të dyshimta të parave në sistemin për trajtimin e falsifikimit të parave.

“Hallka më e rëndësishme në zinxhirin e trajtimit të falsifikimit të parave janë personat të cilët, duke kryer veprimtarinë e tyre profesionale, vijnë çdo ditë në kontakt me paratë e letrës dhe të prera dhe janë pengesa e parë në mbrojtjen e integritetit të parave. Kështu, me forcimin e kapaciteteve të të gjithë trajtuesve të parave të gatshme, sigurohet zbulimi i shpejtë i mostrave të dyshimta, largimi i tyre nga qarkullimi dhe dërgimi në Bankën Popullore”, thuhet në njoftim.

Banka qendrore thekson se ekspertët e Bankës Popullore gjatë viteve organizojnë trajnime të rregullta të detyrueshme për njohjen me elementet mbrojtëse të valutave vendase dhe të huaja, për punonjësit në institucionet financiare, pra në banka dhe qendra cash.

Si rekomandim nga projekti i binjakëzimit “Forcimi i kapaciteteve të sistemit për luftimin e falsifikimit të eurove”, Banka Popullore, siç thuhet në njoftim, ka zgjeruar trajnimin për të përfshirë përfaqësues nga institucionet e përfshira në sistemin për trajtimin e falsifikimit të parave dmth nga Ministria e Punëve të Brendshme, Drejtoria doganore, Prokuroria Publike dhe Policia Financiare.

“Banka qendrore, si i vetmi institucion i autorizuar për përcaktimin e autenticitetit të parave në letër dhe monedha të shprehura në denarë dhe në valutë të huaj, kryen analiza eksperte dhe ofron mbështetje adekuate në procesin e trajtimit të falsifikimit. Në periudhën e kaluar është intensifikuar shkëmbimi në kohë i të dhënave me institucionet kombëtare dhe ndërkombëtare për kryerjen e analizave teknike dhe zbulimin e parave të falsifikuara”, thuhet në njoftim.