Gazeta e njohur Il Corriere Della Sera shkruan se agjenti i gjigandit italian ka planifikuar ardhjen e portierit tek Juventusi në vitin 2022.

Gigio Donnarumma nuk është aspak i kënaqur me situatën e tij aktuale tek PSG. Portieri italian ishte i vetëdijshëm se do të kishte një konkurencë të fortë me Keylor Navas, por kurrë nuk imagjinonte të ulej kaq gjatë në stolin parizien.

Nëse situata nuk ndryshon, do të hapen skenarë të rinj, ku portierin e kombëtares italiane mund ta shohim të veshë fanelën e “të urryerve” të kuqezinjve, Juventusit.

Është mëse e sigurt që Donnarumma s’do të pranonte kurrë të qëndronte rezervë edhe një sezon tjetër. Ndërkohë që edhe Navas ka një kontratë deri në vitin 2024.

Vetë agjenti i italianit, Mino Raiola, ka pranuar publikisht faktin se Donnarumma ka pasur oferta nga Juventusi, por ka përzgjedhur të qëndrojë në Milano.

Tashmë ditët e besnikërisë së padiskutueshme janë larg dhe Donnarumma është i detyruar të mendojë për rritjen e tij profesionale, si dhe për tituj të rinj.

Kalimin në Torino do ta lehtësonte edhe performanca e dobët në këtë fillim sezoni të portierit bardhezi Szczesny.

Si do të reagonin tifozët kuqezi? Patjetër që kjo do të ishte tradhtia më e madhe për ta. Por për portierin kampion europe Milani tashmë është e shkuara dhe me shumë gjasa qasja e tifozëve s’do të bëhej pengesë.
Pra gjithçka duket e menduar mirë nga Raiola, i cili për ekipet e futbollit mbetet një makth, por që për të asistuarit e tij mbetet i pazëvendësueshëm. Gjithçka për tu parë në këto “çmendurira” marketi, që janë kthyer në një spektakël të vërtetë.