Ish-drejtori i Drejtorisë për Siguri dhe Kundërzbulim (DSK) Sasho Mijallkov, do të mbrohet në liri.

Masa e arrestit shtëpiak prej 60 ditëve, e cila iu caktua në rastin “Titanik 2” ku Mijallkov u dënua me burg, i përfundon sot.

Sipas ligjit, pas shqiptimit të aktgjykimit, gjykata mundet të shqiptojë paraburgim derisa aktgjykimi nuk është i plotfuqishëm, i njëjti nuk mund të vazhdohet më shumë se 60 ditë.

Aktgjykimi i ishte shqiptuar më 8 mars dhe pas 60 ditëve i njëjti nuk është i plotfuqishëm. Për t’u fuqizuar është e nevojshme që Gjykata e Apelit të vendos për ankesat e parashtruara.

Nga Gjykata Penale kanë njoftuar se me vendimin për heqjen e burgimit shtëpiak, Mijallkovit i janë shqiptuar masa kujdesi: i është marrë pasaporta, ka ndalesë që të lëshojë shtetin me letërnjoftim, mirëpo edhe që të lajmërohet njëherë në javë në gjykatë.

Kundër këtij vendimi të gjyqit, PSP posedon të drejtën e ankesës deri te Gjykata e Apelit.

Ndryshe, Mijallkov në rastin “Titanik 2” u dënua me 3 vjet e dy muaj heqje lirie.

Ky rast ka të bëjë me manipulimin e zgjedhjeve lokale të vitit 2013, ndërsa edhe Menduh Thaçi u dënua me dy vjet burg.