Ish-futbollisti i Arsenalit, Ian Wright, pretendon se diçka ka ndodhur gjatë kohës së fundit me Xherdan Shaqirin, që ka bërë që ai të mos luajë në shumë ndeshje të Liverpoolit në muajt e fundit.

Trajneri Jurgen Klopp e ka përdorur 27-vjeçarin në pjesën e dytë të ndeshjeve gjatë pjesës së parë të sezonit, mirëpo nuk është aktivizuar për asnjë minutë në asnjë nga katër ndeshjet e fundit, transmeton Gazeta Express.

Më herët, Shaqiri e kishte dëshmuar aftësinë e tij për të ndikuar në ndeshje nga banka rezervë, veçanërisht në ndeshjen kundër Manchester Unitedit, në dhjetor, kur i kishte shënuar dy gola pasi kishte hyrë në ndeshje nga stoli.

Duke folur në BBC Radio 5 Live, Wright e vuri në dyshim arsyen prapa mungesës së Shaqirit dhe arsyes pse Kloppi po i preferon disa lojtarë të tjerë më shumë se futbollistët e tjerë.

“Çfarë ka ndodhur me Shaqirin? Çfarë po ndodh? Ju po thoni se forma e tij ka rënë… Kë e futi Kloppi në lojë para Shaqirit kundër Fulhamit? E kam parë që Kloppi i ka aktivizuar lojtarët e tjerë më shumë se Shaqirin”, ka thënë Wright.

“E kemi parë që Shaqiri e ka bërë diferencën më herët këtë sezon. Ju thoni se forma e tij ka rënë, por mua më duket se diçka tjetër ka ndodhur”.

Gjatë këtij sezoni, Shaqiri i ka bërë 26 paraqitje, gjatë të cilave i ka shënuar gjashtë gola dhe i asistuar tri të tjera.