Sekretari amerikan i Shtetit, Marco Rubio është takuar në Uashington me ministrin për Punë të Jashtme dhe Tregti të Jashtme të Maqedonisë, Timço Mucunski me të cilin ka biseduar për raportet dypalëshe dhe tregtinë.

Sipas Departamentit amerikan të Shtetit, në takim u vunë në pah raporti i fortë mes SHBA-së dhe Maqedonisë së Veriut dhe theksuan interesat e përbashkët në stabilitetin rajonal, bashkëpunimin ekonomik dhe NATO.

DASH tha po ashtu se dy kryediplomatët kanë biseduar për mundësitë e zgjerimit të bashkëpunimit ekonomik përfshirë tregtinë dhe investimet.

Mucunski tha se në takimin në Uashington me Rubion u konfirmua bashkëpunimi mes dy shteteve, që sipas tij, është i bazuar mbi vlera të përbashkëta, “interesa politike dhe miqësi të kamotshme”.

“Shpreha përkushtimin e Qeverisë maqedonase për të avancuar dialogun politik me SHBA-në, si dhe përkushtimin konkret për të institucionalizuar partneritetin strategjik përmes zbatimit të Planit të përbashkët të Veprimit”, shkroi ai në Facebook.