Mungesa e mirëkuptimit dhe bashkëpunimit ndërmjet Maqedonisë së Veriut dhe Bullgarisë ndikon negativisht në klimën e biznesit dhe marrëdhëniet tregtare mes dy vendeve. Duhet të zhvillohet ekonomia, projektet dhe investimet që do t’i hapin rrugë politikave për të arritur një zgjidhje më të lehtë, tha kryetari i Odës Ekonomike maqedono-bullgare Kiril Lazarov.

Në intervistë për “Lokalno”, Lazarov tha se deri në veton e parë të Bullgarisë, marrëdhëniet ekonomike mes dy vendeve ishin në një trend rritës dhe se situata aktuale vetëm sa i distancon dy popujt.

“Nuk ka krizë politike, por ka keqkuptime të pakuptueshme për të gjithë botën që e ndjek nga afër këtë proces. Dhe, kjo imponohet deri në atë masë sa do të shkaktojë anomi dhe mosbesim ndërmjet kombeve. Investitorët seriozë nuk do të duan të investojnë në një vend që nuk ka një udhërrëfyes dhe perspektivë të qartë drejt BE-së, pra jo një, por njëqind procese të Berlinit të ketë. Tregu është thjesht i vogël, i kufizuar dhe joproduktiv, ndaj na duhet tregu i BE-së. Bllokada nga Bullgaria na shkakton edhe dëme të rënda ekonomike sepse i pengon investitorët seriozë. Taktika e keqe e Bullgarisë, pra elitave politike atje. Por në dritën e marrëdhënieve të ardhshme dhe nomenklaturave të reja politike në Bullgari, si dhe interesave strategjike të SHBA-së dhe BE-së në Ballkan, mund të konkludoj se gjërat do të shkojnë në një drejtim shumë më pozitiv. Nuk ka alternativë tjetër, kjo është rruga”, thotë Lazarov.

Ai thekson se në botë ka keqkuptime politike mes disa vendeve anëtare të BE-së, por se ekonomia po funksionon.

Duke komentuar vizitën e paralajmëruar të kryeministrit bullgar Kiril Petkov të planifikuar për më 18 të këtij muaji dhe nëse janë të mundshme lehtësime në marrëdhëniet e ndërsjella, Lazarov deklaroi se nuk sheh alternativë tjetër.

Është e rëndësishme, thotë Lazarov, që politikanët të vendosin të ecin përpara. Ai u thotë atyre të shikojnë nga e ardhmja në vend të së shkuarës dhe miqësi në vend të urrejtjes.

Për Korridorin 8, thotë ai, ka një rëndësi të madhe strategjike dhe beson se ka një potencial të madh për bashkëpunim në shumë fusha që kanë një komponent strategjik si turizmi, projektet e energjisë së gjelbër dhe bujqësia.

Një letër e hapur drejtuar kryeministrave të dy vendeve me thirrje për tejkalimin e keqkuptimeve deri më tani është dërguar nga disa shoqata civile nga Bullgaria dhe Maqedonia e Veriut, si dhe nga Oda Ekonomike Maqedono-Bullgare. Ata e mirëpritën dëshirën e Petkovit dhe Kovaçevskit për ndryshim dhe shfrytëzimin e muajve të ardhshëm për të arritur rezultate pozitive.