Kryeministri i Shqipërisë, Edi Rama në një intervistë për rrjetin prestigjioz televiziv evropian “Euronjuz”  i paralajmëroi vendet e Bashkimit  Evropian se do të jetë e dëmshme për rajonin, nëse para Shqipërisë fillojnë bisedimet për aderimin e Maqedonisë së Veriut, transmeton ATSH.

“Evropa nuk po vështron më nga Lindja. Procesi i zgjerimit të BE drejt Ballkanit duket se po pëson një goditje”, theksoi Rama, duke shprehur shqetësimin për precedentin që po përjeton Maqedonia e Veriut në krahasim me vendin e tij për negociatat e anëtarësimit, një fakt që sipas tij mund të destabilizojë të gjithë rajonin.

”Duhet të marrim parasysh faktin që gjithmonë e më shpesh procesi vendimtar i Këshillit nuk bazohet mbi ato që bëjmë, për ato që bëjnë vende si tonat, por mbi situatën e brendshme ose dinamikën e brendshme politike të shteteve të ndryshme anëtare”, deklaroi Rama.

Sipas rezultateve të një hetimi të Këshillit Evropian, opinion publik i BE-së po bëhet gjithnjë e më kundërshtues përballë vendeve të reja pretendente për anëtare. Frika ndaj migracionit janë rritur me përfshirjen e Bullgarisë, Rumanisë dhe Kroacisë, por më tej opinioni publik ka ende shumë pengesa që Shqipëria duhet të kalojë për anëtarësimin në Bashkimin Evropian.

Ka shumë fusha për të cilat institucionet shqiptare në kompleks duhet të vazhdojnë punojnë, thekson ambasadori i Bashkimit Evropian në Tiranë. Lufta e përditshme kundër korrupsionit, lufta kundër krimit të organizuar dhe trafiku i drogës që po ndryshon taktikë.

“Por, anëtarësimi në BE është pikësynimi i Shqipërisë”, siç e shpjegon vetë kryeministri.

“Për ne Evropa nuk është thjesht një proces burokratik, një grup vendesh të zhvilluara në të cilat ëndërrojmë të përfshihemi, për ne është ajo që ishte për Etërit Themelues që e krijuan atë si një projekt paqeje dhe bashkëpunimi”, theksoi kryeministri Rama, transmeton ATSH.