Ndonëse paralajmëruan që mesi i muajit dhjetor do t’i sjell emrat e VMRO-DPMNE-së për Qeverinë teknike, partia e Hristijan Mickoskit mësohet se deri tani këtë çështje nuk e ka hapur zyrtarisht brenda organeve. Burime nga partia më e madhe opozitare bëjnë me dije se ka kandidatë potencial, emrat e të cilëve nuk duan t’i shpalosin, por thonë se javën që vjen do të diskutohet drejtpërdrejtë për gatishmëritë e tyre në bartjen e funksioneve gjatë Qeverisë teknike.

Çështja e Qeverisë teknike nuk është hapur as në organet e LSDM-së. Kryeministri Zoran Zaev ditë më parë deklaroi se në mesin e kandidatëve të përfolur për kryeministër teknik janë ministri i Brendshëm, Oliver Spasovsi dhe ministrja e Punës dhe politikës sociale, Milla Carovska. Në dy resorët, partia më e madhe në pushtet propozon zëvendësministra plotësues. Ndërsa në Financa, Shoqëri Informatike dhe Bujqësi, zëvendësministra plotësues propozon partia më e madhe opozitare.

Në përputhje me Ligjin për Qeveri, më 3 janar, bashkë me kryeministrin Zaev nga pozita duhet të largohen edhe Spasovski dhe Carovska. Largimin e tij e ka paralajmëruar edhe zv.kryeministri për çështje ekonomike, Koço Angjushev.

Më 3 janar Qeveria merr karakterin teknik për gati 100 ditë, apo deri më 12 prill kur edhe janë paraparë zgjedhjet e parakohshme parlamentare. Referuar afateve, më 11 shkurt duhet të shpërndahet Kuvendi. Lidhur me akuzat e opozitës se pushteti po tenton shtyrjen e datës së zgjedhjeve të parakohshme, kryeministri Zaev ditë më parë edhe një herë ka konfirmuar se nuk ka arsye që 12 prilli të zhvendoset si datë për zgjedhje.