Koalicioni VLEN ka dalë me një qëndrim rreth kallëzimin penal për Drin Ahmeti, nipin e kreut të BDI-së, Ali Ahmetit. Në një komunikatë me shkrim, VLEN u ka bërë thirrje autoriteteve gjyqësore që të veprojnë vetëm sipas ligjit, të lirohen nga ndikimet politike dhe të japë drejtësi bazuar në provat e paraqitura në një procedurë të drejtë dhe transparente.

Më tej shkruhet se ligjet duhet të zbatohen në mënyrë të barabartë për të gjithë, pavarësisht nga përkatësia etnike, fetare apo politike. “Kthimi i besimit në sistemin ligjor nuk guxon të shndërrohet në pika të politikës ditore. Nuk na gëzon fakti që një parti politike si BDI-ja lidhet me dyshime të rënda dhe indikacione për raste të shumta të korrupsionit politiko-familjar.

Këto rrethana rrënuese i hedhin njollë të gjithë shqiptarëve. Dyshimet e tilla janë një tjetër argument plus se BDI duhet të reformohet sa më shpejt dhe të fillojë të veprojë si një opozitë konstruktive”, shkruhet në qëndrimin e VLEN, ku përfundojnë duke thënë se është detyrimi i tyre që të mos lejojmë që kjo kryesi e BDI-së e mbërthyer në të kaluarën të përpiqet t’i bëjë shqiptarët mburojë për skandalet e tyre korruptive.