Të hënën një grup deputetësh nga shumica e re qeverisëse pritet të dorëzojnë në Kuvend ndryshimet ligjore përmes të cilave planifikohet krijimi i ministrive të reja dhe transformimi i ministrive ekzistuese.

Kryetari i Kuvendit, Afrim Gashi, dje ka njoftuar se në seancën e parë që do të caktojë, edhe para formimit të Qeverisë, do të bëhen ndryshime në ligjet e sistemit për të mundësuar formimin e ministrive të reja dhe transformimin e ministrive ekzistuese.

Gjithashtu, agjenda mund të përfshijë ndryshime që do të shmangin zgjedhjet e parakohshme për kryetarët e komunave.
Ndryshimet në këto ligje të sistemit kërkojnë shumicë prej dy të tretash.

Në programin zgjedhor të VMRO-DPMNE-së parashihen Ministria e Ekonomisë dhe Punës, Ministria e Energjisë, Minierave dhe Burimeve Minerale, Ministria e Politikës Sociale, Demografisë dhe Rinisë, Ministria e Sportit, Ministria e Kulturës dhe Turizmit, si dhe Ministria e Transformimit Dixhital.