Mjekët gjithandej botës gjithnjë e më shumë po e theksojnë nevojën për gjumë të plotë dhe më kualitativ si diçka jetike për të qenë të shëndoshë, për ta pakësuar rrezikun e sulmeve ose sëmundjeve të tjera të rënda.

Një studim i bërë në vitin 2022 nga Lidhja Amerikane për Zemrën tregon se numri i orëve të gjumit që bëjmë është një pyetje shumë e rëndësishme dhe relevante që mjekët duhet t’ua parashtrojnë pacientëve, sikurse pyesin për tensionin, pirjen ose jo të duhanit, dietën ushqimore dhe ushtrimin fizik që luajnë rol kyç në shëndetin tonë.

Njerëzit që flenë më pak se 5 orë në ditë kanë tre herë më shumë gjasa të pësojnë goditje në tru sesa ata që flenë mesatarisht 7 orë, tregon edhe studimi i revistës mjekësore “Neurology”.

Studimi i një grupi shkencëtarësh nga e gjithë bota ka hulumtuar shëndetin e 2.243 personave që kanë pasur goditje në tru dhe 2.253 personave që nuk kanë pasur goditje në tru, në moshë mesatare prej 62 vjeç.

Pjesëmarrësit në hulumtim janë pyetur për mënyrën e gjumit, kohëzgjatjen, cilësinë e tij, përgjumjen, gërhitjen, frymëmarrjen nëpërmjet hundës dhe frymëmarrjen në përgjithësi gjatë gjumit.

Këto pyetje kanë çuar shkencëtarët në përfundimin se gjumi i tepërt ose i pakët, dremitjet e gjata, gjumi me cilësi të dobët, gërhitja, nuhatja dhe apnea e gjumit u identifikuan si probleme me gjumin. Ndërsa personat që kishin pesë apo më shumë nga këto simptome, kishin rrezik më të lartë për goditje në tru.

Njerëzit që flenë më pak se pesë orë në ditë, sipas shkencëtarëve, kanë tri herë më shumë gjasa të pësojnë goditje në tru sesa ata që flenë mesatarisht 7 orë. Ndërsa personat që flinin më shumë se 9 orë kishin dy herë më shumë gjasa të pësonin goditje sesa ata që flinin 7 orë.

Ata që dremisin për më shumë se një orë kishin 88 për qind më shumë gjasa të pësonin goditje sesa ata që nuk bënin një sy gjumë gjatë ditës.

Përderisa problemi me gjumin mund të dallojë nga një njeri te një tjetër, ka disa faktorë të përgjithshëm që ndikojnë në çrregullimin e gjumit dhe problemet lidhur me të. Ekspertët rekomandojnë të ndiqen disa këshilla bazike për gjumë më cilësor.

· Vendosni një orar të rregullt gjumi dhe zgjimi që do ta zbatoni edhe gjatë fundjavave ose ditëve të lira.

· Mënjanoni pajisjet digjitale nga afërsia.

· Hiqni nga pamja orët, sidomos ato digjitale.

· Shmangni gjumin në temperaturë nën 12,5 gradë celsius ose mbi 21 gradë celsius.

· Reduktoni kafeinën dhe shmangni ushqimin të paktën dy deri në tri orë para gjumit.

· Mos bëni ushtrime fizike disa orë para gjumit.