Edhe Tirana e Shkupi protestojnë për rastin e përdhunimit të 11-vjeçares
Sot në Prishtinë do të protestohet për rastin e përdhunimit të 11-vjeçares në sheshin “Zahir Pajaziti”.

Protesta e cila është shpërndarë gjithandej do të nisë në orën 12:00.

Pos Prishtinës, protestë do të mbahet edhe në Tiranë e Shkup.

Sipas njoftimeve, në Tiranë mbledhja në sheshin “Nënë Tereza” nis në orën 18:30, ndërkohë në Shkup në orën 17:00, transmeton Klankosova.tv.

07:50 – Sot protestohet në mbështetje të 11-vjeçares së dhunuar

Në sheshin “Zahir Pajazitit” në Prishtinë sot nga ora 12:00 do të protestohet në mbështetje të 11-vjeçares, e cila u dhunua nga pesë burra në kryeqytet.

Kolektivi për Mendim dhe Veprim Feminist ka deklaruar se nga kjo protestë kërkojnë mbrojtje dhe siguri nga shteti për vajzat dhe gratë, trajtim të drejtë të rasteve të dhunës ndaj grave dhe dënime meritore për dhunuesit si dhe legalizimin e përdorimit dhe shpërndarjen e gazit irritues për vetëmbrojtje (pepper spray).

“Kësaj gjendjeje terrori duhet t’i vije fundi. Vajzat dhe gratë në Kosovë nuk mund të jetojnë asnjë ditë tjetër me frikë. Djemtë e burrat nuk mund të amnistohen nga shteti dhe shoqëria për dhunën që ushtrojnë ndaj vajzave dhe grave. Përdhunimi i vajzës së mitur dhe i dhjetëra grave tjera veç gjatë këtij viti përveç që na indinjon, na revolton dhe na fton në radikalizim të mjeteve tona të protestës e vetëmbrojtjes”, thuhet në njoftim.

Të dyshuarit për dhunimin e kryer janë arrestuar dhe janë në paraburgim. Drejtori i Policisë së Kosovës, Samedin Mehmeti, dje ka dhënë dorëheqje pas këtij rasti.