Qytetarët e Maqedonisë së Veriut paguajnë më shumë për pagesat rrugore, në krahasim me vendet e rajonit, si Serbia, Greqia, Shqipëria dhe Bullgaria.

Në një analizë që është bërë nga “Metamorfozis”, nëse çdo ditë punë udhëtohet me makinë në relacionin Shkup-Gjevgjeli, që përfshihen 154 kilometra, qytetarët e Maqedonisë së Veriut do të duhet të paguajnë 6840 denarë për pagesat rrugore.

Ndërsa nëse çdo ditë pune udhëtohet në relacionin Shkup-Gostivar (66.3 kilometra), për pagesat rrugore qytetarët e vendit duhet të harxhojnë 5320 denarë.

Ndryshe nga pagesat në vendin tonë, në Serbi nëse qytetarët çdo ditë pune udhëtojnë në rrugën Smederevë-Beograd (63 kilometra) për pagesat rrugore harxhojnë 3800 dearë. Kurse në rrugën Katerini-Selanik (70 kilometra) në Greqi, qytetarët paguajnë 2860 denarë pagesa rrugore.

Ndërkaq në Shqipëri në rrugën Kukës-Tiranë e cila ka 144 kilometra, për pagesat rrugore qytetarët harxhojnë 1840 denarë.

Pagesat rrugore më të lira janë në Bullgari. Nëse qytetarët e këtij vendi çdo ditë pune udhëtojnë në rrugën Sofje-Pllovdiv (153 kilometra) për pagesa rrugore harxhojnë 940 denarë.