33 të burgosur palestinezë, duke përfshirë 30 gra dhe tre fëmijë, u liruan nga burgjet izraelite, në kuadër të marrëveshjes për shkëmbimin e të burgosurve ndërmjet Hamasit dhe Izraelit.

Të burgosurit nga Bregu Perëndimor i pushtuar u liruan nga burgu ushtarak i Izraelit, Ofer, me një autobus të Kryqit të Kuq Ndërkombëtar dhe më pas u transferuan në Ramallah.

Ushtarët izraelitë ndërhynë me gaz lotsjellës dhe plumba të vërtetë kundër njerëzve që ishin mbledhur në qytetin Beitunya për të mirëpritur të burgosurit palestinezë, ndërsa Ministria palestineze e Shëndetësisë njoftoi se si pasojë e zjarrit një palestinez ka mbetur i vrarë.

Mes të liruarve janë nëntë persona nga Kudsi, ndër të cilët është i burgosuri më i ri Nofooth Hammad (16 vjeç) nga lagja Sheikh Jarrah, i cili u dënua me 12 vjet burg, ndërsa 24 të tjerët janë nga krahinat e Bregut Perëndimor.

Ky është grupi i katërt i të burgosurve palestinezë që lirohen nga burgjet izraelite pas marrëveshjes për pauzë humanitare të arritur midis Hamasit dhe Izraelit në Rripin e Gazës, të ndërmjetësuar nga Katari, Egjipti dhe Amerika.

Pauza humanitare katërditore midis Hamasit dhe Izraelit hyri në fuqi të premten, më 24 nëntor, në orën 07:00 me kohën lokale, ndërsa të hënën Ministria e Jashtme e Katarit njoftoi se pauza humanitare është zgjatur edhe për dy ditë.

Sipas marrëveshjes humanitare të arritur, 150 palestinezë në burgjet izraelite do të lirohen në këmbim të 50 të burgosurve izraelitë që mbahen nga Hamasi.

Izraeli nisi sulme brutale në Rripin e Gazës pas një sulmi ndërkufitar nga grupi palestinez Hamas më 7 tetor. Që atëherë, më shumë se 15.000 palestinezë janë vrarë, duke përfshirë 6.150 fëmijë dhe më shumë se 4.000 gra, sipas autoriteteve shëndetësore në enklavë. Numri zyrtar i të vdekurve në Izrael është 1.200.