Saturday, 15 December 2018 | Lajme: 0

Posta zvicerane dërgon mostrat laboratorike me dron nëpër spitale

Pas Luganos TI dhe Bernë, Posta e Zvicrës gjithashtu do të dërgojë rregullisht një dron në Cyrih javën e ardhshme. Ka për qëllim transportimin e mostrave laboratorike në mes të Spitalit Universitar Unispital dhe Irchel të Cyrihut, në mënyrë krejtësisht autonome.

Fluturimet e para testuese do të fillojnë më 6 dhjetor. Droni do të fluturojë nga dita e 10 dhjetorit, mes orës 7.30 dhe 16.45, shkruan posta në një komunikatë, përcjell albinfo.ch. Në fundjavë dhe gjatë festave droni mbetet në pistë.

Posta planifikon nga pesë deri në dhjetë fluturime me dronë në ditë, duke mbuluar distancën ndërmjet dy vendeve më shpejt se sa në rrugë tokësore. Shpejtësia mund të jetë e rëndësishme për operacionet spitalore. Përveç kësaj, dronët janë më ekologjik.

Projekti pritet të zgjasë një vit. Pajisja e përdorur në Cyrih ka sisteme moderne të sigurisë – por pa kamera në rrugë. Në këtë projekt janë përfshirë Zyra Federale e Aviacionit Civil (Bazl), kontrolli i trafikut ajror “Skyguide” dhe autoritetet lokale, përcjell albinfo.ch.